ปลายฝน ต้นหนาว ที่เจียงฮาย

ฟังดูจากจิต ฮู้มาจากใจ ความคิดเป๋นใหญ่ ในหล้า

ใกล้ถึงมาแล้ว ต้นหนาวแสนค่า ของเดือนตุลา พอสอนี้นั้น

จะหนาวแหมแล้ว ปี้แก้วว่าอั้น ตัวน้องเจียงจัน จื้นสู้

หนาวตี่เชียงฮาย บนดอยลุ่มลู่ หมอกไม้จื้นสู้ ยินดี

อยากหื้อเพื่อนฮัก มวลฝูงกำดี หน้าหนาวปีนี้ ตากเหมอยตวยกัน

แยงดอยภูผา ดอกเอื้องไม้พันธ์ แนบหูเพื่อนนั้น เสียที

หากว่าหนาวกาย หื้อเอาใจห่ม ปกไว้หื้อสม เสียเต๊อะ

ส่วนว่าหนาวใจ ผู้ใดก็เยอะ เสาะหาเอาเต๊อะ มากมีอวดอ้าง

หน้าหนาวปีนี้ หมดใจอ้างว้าง จักเซาะน้องนาง คู่หิงไฟเล่น คู่หิงไฟเล่น

ธ.สุธานพงษ์

๓ ตุลาคม ๕๒

สังขารของมนุษย์

สิบปี อาบน้ำบ่หนาว ซาวปีแอ๋วสาวบ่ก่าย สามสิบปีบ่หน่ายสังขาร
สี่สิบปี ยะการเหมือนฟ้าผ่า ห้าสิบปีสาวน้อยด่าบ่เจ็บใจ หกสิบปี ไอเหมือนฟานโขก
เจ็ดสิบปี มะโหกเต็มตัว แปดสิบปี ไขหัวเหมือนไห้ เก้าสิบปี ไข้ก็ตายบ่ไข้ก็ตาย

Advertising Zone    Close